Formaður Timburmanna hefur sagt upp öllum starfsmönnum á skrifstofu Timburmanna, og er að sögn um meiriháttar hagræðingarátak. Um er að ræða um það bil fimmtíu starfsmenn sem starfað hafa á skrifstofunni um margra ára skeið. “Já ég skil ekkert í þessu” – sagði formaðurinn í eldheitu spjalli við tíðindamann Timburfrétta. “Ég vissi ekki einu sinni að við ættum skrifstofu, hvað þá að við værum með starfsmenn þar! Ég var bara á leið til tannlæknis og fór óvart í vitlaust hús og þá var ég bara allt í einu mættur í skrifstofur Timburmanna og þar var bara fullt af einhverju liði að vinna, svo ég bara rak þá alla, mér datt bara ekkert skárra í hug svona í fljótheitum.” Aðspurður sagðist formaðurinn alls ekki sjá eftir þessu enda hafi hann farið stuttu síðar til tannlæknisins sem dró úr honum samviskuna!
